తెలుగు హీరోలు తమిళ హీరోలకంటే ఒక విషయంలో వెనకబడిపోతున్నారు. హీరోలు అనేకంటే నిర్మాతలంటే బాగుంటుందేమో? కమల్ హాసన్, రజినీ కాంత్, విక్రం, సూర్యా, శంకర్, మణి రత్నం వీరందరికీ ఒక పోలిక ఉంది. తమిళ చిత్ర పరిశ్రమకు చెందిన ఈ నటులు మరియు దర్శకులందరూ దక్షిణాదిన అన్ని భాషల్లో మార్కెట్ సృష్టించుకున్నారు.. కానీ మన తెలుగు చిత్ర పరిశ్రమ నటులు, నిర్మాతలు తెలుగు కి మాత్రమే పరిమితమవుతున్నారు. అందుకే తెలుగు సినీ నటులు ఒక రజినీ కాంత్, కమల్ హాసన్, యువ నటుడు సూర్యా లాగా దక్షిణాదిన అన్ని భాషల్లో తమ మార్కెట్ ని విస్తరించుకోలేకపోతున్నారు.
తెలుగులోనే 100 కోట్లు వసూళ్ళు రాబట్టిన మగధీరని దక్షిణాదిన మిగిలిన అన్ని భాషల్లో అనువదించి విడుదల చేసినట్లయితే మరిన్ని వసూళ్ళు రాబట్టేదేమో? అదృష్టం కలిసివస్తే అక్కడ కూడా హిట్ అవ్వచ్చేమో కదా? తెలుగు లోని యువ నటులు ఎన్.టి.ఆర్ , అల్లు అర్జున్ , మహేష్ బాబు , రానా, రవి తేజ , మంచు బ్రదర్స్ , శ్రీకాంత్, నాగ చైతన్య, తరుణ్, అల్లరి నరేష్, గోపీ చంద్ ,సిద్దార్థ్, ప్రభాస్, రాం, నాని, నవదీప్, వరుణ్ సందేశ్, నితిన్ వీరంతా తప్పనిసరిగా తమ సినిమాలు తెలుగుతో పాటుగా వీలైనన్ని ఇతర భాషల్లో విడుదలయ్యేటట్లు ముందుగానే ప్రణాళికలు రచించుకోవాలి. యువతతో ఉరకలేస్తున్న టాలీవుడ్ పర భాషా నటులకు తెలుగు వాడి పవరేంటో చూపించాలి. చిరంజీవి , బాల క్రిష్ణ , నాగార్జున, వెంకటేష్ లాంటి అగ్ర నటులంతా తెలుగు కి మాత్రమే పరిమితమయ్యారు వీరిలా కాక నేటి తరం నటులు ద్వి భాషా చిత్రాలపైన తప్పనిసరిగా దృష్టి పెట్టాలి.
ఆ తరం తమిళ హీరోలు చూపిన దారిలోనే ఇవ్వాల్టి కొత్త తరం తమిళ హీరోలు దూసుకుపోతున్నారు. విక్రం అపరిచితుడు, మల్లన్న, విలన్ గా తెలుగు లోకి ఎంటర్ అయ్యాడు. సూర్యా గజిని తో మొదలుపెట్టి ఆరు, దేవా, ఘటికుడు, యముడు అంటూ తెలుగు గోల్ పోస్ట్ పైన దాడి చేస్తూనే ఉన్నాడు. మొన్నటికి మొన్న తమిళ యువ కధానాయకుడైన కార్తీ వరుసగా యుగానికొక్కడు, ఆవారా అంటూ తన ప్రతీ తమిళ సినిమాని తెలుగు లో విడుదల చేసి మార్కెట్ పెంచుకుంటున్నాడు. వీరిని మన తెలుగు నటులు, నిర్మాతలు అనునసరించి కొన్ని జాగ్రత్తలు తీసుకుంటే చాలు, దక్షిణాదిని తెలుగు చిత్ర పరిశ్రమ పాలించే రోజులు మరెంతో దూరంలో ఉండవు.
తెలుగు నిర్మాతలు తమ ప్రతి సినిమాని అనువదించి ఇతర భాషల్లో విడుదల చేయటానికి సన్నద్ధం కండి. సుడి బాగుంటే మీపైన కనక వర్షం కురవొచ్చు....
No response to “తెలుగు హీరోలు తమిళ హీరోలని చూసి నేర్చుకోండి.”
Post a Comment